Би бүтэх, бүтэхгүй зөндөө юм мөрөөддөг. Америкт ирснээс хойш миний бүтэж болмоор мөрөөдлүүд маань биелж байгаад би туйлын их баяртай байна. Аз жаргал гэдэг чинь мөрөөдлөө биелүүлэх л байх даа ))) Ганц олдох амьдралдаа заавал хийнэ гэж бодсон зүйлсээс эхнээсээ биелэгдэн хасагдаж байгаа ч хүн гэдэг шуналтай хойно доо, хүслийн жагсаалт маань улам уртассаар ^_^
1. Гүн шөнийн цагаар далайн эрэг дээр зогсон, тэнгэрээс буусан одод шиг хотын гэрлийг харж, чулуу цохин үсчих далайн давалгааг сонсон, зөөлөн зөөлнөөр цацрах усны дуслыг мэдрэх
2. Хэн ч хөл тавиагүй аглаг ойд очиж, шувууны жиргээн сонсон, эртний хуучин замаар алхаж, энэ дэлхий дээр ганцаараа байгаа юм шиг аварга моддын дунд дуу аялан гүйх
3. Юуг ч бодолгүйгээр хашхирах. Сэтгэлийнхээ гүнд нуугдсан хар бүхнийг гартал зүгээр л зоргоороо орилоx. Хааяа хааяа дотуур байрандаа ингэж хашхирмаар санагддаг ч нэрээ бодоод дуугай л өнгөрдөг байсан.
4. Захгүй далай ширтэн, энэ их усны доор юу нуугдаж байгааг тааж ядан, манан дундаас шөнийн оддыг хайх. Давалгаанаас өөр чимээгүй нам гүм орчинд "өөрийгөө" сонсох
5. Дээрээд алтан нар, доороос шаргал элс шарсан дулаахан орчинд, далайн чийг үнэрлэн хайртай номоо унших
6. Хурдны замаар галзуу юм шиг давхих спорт машинд зогсож, дээд цонхоор нь толгойгоо гаргаад, салхийг жинхэнэ утгаар нь мэдрэх
7. Хар багаасаа л мөрөөдсөн. Зургийг нь хараад ойлгомжтой байгаа биздээ ))) 
No comments:
Post a Comment